القهوة


اهلا بيك ف القهوة. ادخل متتكسفش، دي القعدة لسة هتبتدي و المشاريب ببلاش. في القهوة هتسمع كل حاجة، راجل عجوز بيكلم في السياسة ، او شاب صغير بيتكلم في الرياضة. هتلاقي عيل صغير بيكلم اصحابه عن اخر فيديو جيم، و هتلاقي واحدة بتكلم صاحبتها عن البلوزة اللي اشترتها امبارح. ايوة، هتلاقي بنات في القهوة. المكان راقي بالرغم من اسمه، و مناسب لجميع الاعمار و الاجناس. القهوة على طول مفتوحة، عمرك م هتيجي و نقوللك لا. مش عاوزينك تقلق، دايما هتلاقي مكان. عاوزينك بس ترتاح في الكرسي و تطلب زي ما انت عاوز. في القهوة كل الناس اصحاب، محدش بيحرج حد حتى لو اعترض على وجهة نظره. انا عارف انك لسة جديد، و انا مش اقدم منك ولا حاجة، صدقني هتحب الجو، في القهوة كله صاحب مكان. ادخل متتكسفش، دي القعدة هتحلو و المشاريب على طول ببلاش
.

Sunday, January 24, 2010

ماهي كوسة



من كام يوم كده، امي تعبت شوية و احتاجت حبة فحوصات و تحاليل و الذي منه. خدتها و رحنا المستشفى اللي بتشتغل فيه خالتي علشان تقوم بالواجب و كده. و احنا داخلين وحدة الاشعة المقطعية ، خالتي نفضت للممرضة اللي ع الباب وراحت داخلة للدكتور على طول. مفيش خمس دقايق كانت امي بتعمل الاشعة. و انا قاعد في الانتظار بقى ، ركزت مع تعلقات الناس

" طبعا مش دكتورة، لازم يعملوا معاها الواجب"
"يعني حرام ده ولا حلال يدخلوا ست قد البقرة كده قبل الواد الصغير ده "
" متزعلش يا ست، اصل البلد دي ماشية بالكوسة"


ايوة البلد ماشية بالكوسة، مش عارف ايه اللي مضايقهم.
خليني اسالك سؤال، لو انت والدك لواء شرطة، هتروح تعمل البطاقة زي بقية البشر ولا هتقعد في بيتكو و تستنى البطاقة تجيلك لحد عندك؟
لو تعرف حد في المرور، هتتلطع ساعتين عشان تجدد رخصتك؟
بلاش يا عم، لو انت تعرف الراجل اللي بيبيع العيش، ه تقف في الطابور؟ طبعا لا/ يبقى ليه بقى بتتضايق لما تاقي حد بيمشي مصلحته بالكوسة؟ هو عشان انت معرفتش تمشي امورك ، يبقى الناس اللي عرفوا وحشين و بقر؟
لما تبقى الكوسة لحد غيرك تبقى زبالة لكن لما تبقى ليك تبقى مارون جلاسيه؟
لو الكوسة مضايقاك اوي كدة، ليه مش بتقول لا؟ ليه بتقبل المعاملة الخاصة لما بتلاقيها؟
لو الكوسة مضايقاك اوي كده، ليه مش بتقف في طبور العيش زي بقية البشر حتى لو اللي بيبيع هو ابنك او اخوك او صاحبك؟
يعني انت عاوز تاخد عيش قبل الناس لكن مش عاوز حد يعمل اشعة قبلك؟

اعذرني ، لكن انت منافق و بتضحك على نفسك. و لحد ما تواجه نفسك بالحقيقة دي، هتفضل تعبان، و محدش هيعبرك

شعور بالعظمة (احلام مراهق)

مجرد شاب في عمر المراهقة. تراني كثيرا في كل مكان. امثالي بالالاف في الجامعات و على نواصي الشوارع في كل المدن. لا يميزني عنهم اي شيئ على الاطلاق.
يومي عادي جدا. يبدا بعد الظهر مثل كل من في عمري -او معظمهم على الاقل- و ينتهي بعد منتصف الليل بفترة ليست بالقليلة. الا ان يومي يختلف تماما في اللحظة التي اطفئ فيها الاضواء ليغلف الظلام غرفتي، و بعد ان ادخل تحت اغطيتي
في هذه اللحظة، اكف عن كوني مجرد مراهق. في هذه اللحظة اطلق العنان لخيالي ليفتح لي عوالم لم يدخلها بشر.
في هذه اللحظة انا اقوى من شمشون و اغنى من قارون
انا اوسم من ليوناردو دي كابريو و اسرع من ادهم صبري
انا اذكى من بيل جيتس و انقى صوتا من سيلين ديون
انا اكثر شعبية من الاميرة دايانا و ابرع في الرقص من مايكل جاكسون
في هذه اللحظة، انا ملك العالم ، بل الكون كله
اقترب من الكمال حتى اكاد المسه باناملي
في هذه اللحظة، انا اقرب ما يكون البشر الى الالوهية
لكن اللحظة تمر، لادخل في عالم الاحلام التي لا اذكر منها شئ
تنتهي حالة النشوة التي امر بها مع اخر قطرات الوعي التي تنساب الى بحر من الفراغ، لاستيقظ في الصباح التالي
مجرد مراهق عادي

Friday, January 22, 2010

ولا مؤاخذة



قاعدة الكبانيه عندنا مكسورة. لكن لان الكسر مش كبير فمحدش عاوز يكلف نفسه و يغيرها. بس بالرغم من أن الكسر مش كبير، كل مرة بقعد علشان اعمل.....احم.... مكالمة تليفون مهمة، القاعدة بتوجع لي رجلي. كل مرة بقول ""يوه القاعدة دي لازم تتغير" و أول ما اخلص ال...احم... مكالمة، بنسى الموضوع تماما. اقولك، تعالى نتكلم عربي شوية. الكلام السابق - رغم انه صحيح، و المشكلة في طريقها للحل – يعبر عن حال بلدنا العزيز حاليا. و بالرغم من انك ربما تعتقد أنني لست في حالة عقلية جيدة بسبب القاعدة المكسورة، إلا أنني اعتقد انه كلام دقيق جدا.اعذرني هاقطع حبل أفكارك، اصل العربي ده مش نافع معايا. كنا بنقول إيه، أه قاعدة الكبانيه. لو تبص في أي حتة في مصر هتلاقي قاعدة الكبانيه المكسورة. خد عندك نظام التعليم. النظام كله قاعد على قاعدة مكسورة، و الكسر عمال يكبر. لكن لحد ما القاعدة تتدشش خالص، محدش هيتعب نفسه و يغيرها.عاوز مثال تاني؟ اقولك. حادثة القطر الاخرانية دي، إيه اللي حصل بعديها؟ الوزير استقال. يا فرحة قلبي. و بعدين يعني؟ أهالي الناس اللي ماتوا دول هيعملوا إيه باستقالة الوزير؟ على الأقل رجل الوزير اللي وجعته من القاعدة كانت هتخليه يغيرها. لكن لا، أنا أغير القاعدة ليه؟ أنا اعزل من البيت و اسيب القاعدة لحد تاني يا يغيرها يا ميغيرهاش.البلد كلها قاعدة على قاعدة مكسورة، و لحد القاعدة متتغير، هتفضل رجلينا توجعنا.

Wednesday, January 20, 2010

تهييس اخر حاجة

امبارح صحيت الصبح بدري عشان كنت عاوز اروح الكلية اشوف اخبار الامتحانات. اصل انا الترم ده معنديش غير تلات مواد من اصل ستة عشان انا عايد السنة. المهم، نزلت من البيت و ركبت تاكسي، و دي حاجة انا نادرا لما بعملها لان انا ساكن بعيد عن الكلية و التاكسي بيقلبني صح في الكاشات، بمناسبة التاكسيات، حد سمع عن حوار التاكسي الحريمي ده ؟ بيقولك هيبقى لونه بمبة مسخسخ، و هيسوقه حريم و ميركبوش غير الحريم. و بعدين يقوللك المساواة بين الرجل و المراة. يعني انا لو مروح الساعة اتنين بالليل و مش لاقي غير التوكسة الحريمي، مروحش؟ قال مساواة قال.

المهم، انا بقى لما ركبت التاكسي لقيت الراجل بيفتح في مواضيع غريبة الصراحة. مش عارف ليه معظم السواقين بيكلموني في حاجات غريبة اخر حاجة، تلاقي سواق بيكلمني عن فلسطين اللي بتتاكل، و والله يا بيه لولا المرة و العيال اللي مرميين في البيت لا كنت طلعت على اسرائيل دي دششتها. او تلاقي واحد تاني يكلمني عن الحرامي اللي سايق عربية بمليون جنيه جايباهالو امه، منين حرامي و منين جايباهاله امه؟ مش عارف ليه نادرا لما بقع في سواق عادي كدة يكلمني في موضوع طبيعي، زي مثلا ماتش مصر و بنين اللي خلص اتنين صفر بالمناسبة، او المزة اللي ماشية في الشارع ببنطلون ضيق اخر حاجة و بعدين تزعل لما الشباب يعاكسوها.

هو انا كنت بقول ايه.؟ اه.... سواق التاكسي ده بقى كان فرحان اوي بالسيول اللي في اسرائيل و والله يا برنس ده غضب ربنا عليهم، اصل الحاجات دي مبتحصلش كدا. و لما قلتله ان فيه سيول في سينا و اسوان و الناس نايمة في الجوامع، بصلي بصة عجيبة كدة زي ما اكون كفرت و راح ساكت.

المهم وصلت الكلية حتة واحدة الحمدلله. و انا داخل بقى كانت البوابة مفتوحة على وسعها و البشر داخلة طالعة بدون رقيب، قولت كفاءة، اصل انا كنت نسيت الكارنية، و الحرس ميحلالهومش ان هما يسالوني ع الكارنيه غير لما اكون ناسيه، و يبقى الراجل معدي سبع انفار قبلي من غير ما يكح في وشهم و تيجي عليا انا و تقفل. المهم جيت ادخل بقى لقيت العسكري بينده عليا. قال ايه سنة تانية بس اللي تدخل عشان عندهم امتحان، و انت اش عرفك ان انا مش في سنة تانية .؟ المهم سهيت لعسكري و دخلت لقيت ان سنة رابعة هي اللي عندها الامتحان مش تانية. رحت طالع على مكتبة الاشرف اجيب ورق الاقتصاد، اصل انا عندي امتحان يوم 25 و لسة لحد دلوقت معرفش ولا كلمة. و بعدين اصل الاقتصاد مهم جدا في البلد، عشان كدة تلاقي اقتصاد وعلوم سياسية بتاخد مجموع كبير اوي.

بمناسبة المجموع الكبير، انا كنت جايب مجموع كبير نسبيا في تانية ثانوي، معرفش ايه اللي حصل في تالتة خلاني اجيب مجموع زي الزفت مع اني كنت مذاكر والله. السنة اللي فاتت بقى مفتحتش كتاب و عشان كده وقعت سنة. و بعدين اصل الوقوع مش وحش، يعني التفاحة اللي وقعت على دماغ نيوتن و خلتة يكتشف الجاذبية دي وحشة ؟ و بعدين تفاحة ايه دي اللي لازم تقع على دماغه عشان يكتشف الجاذبية؟ هو وقوفه على الارض في حد ذاته مش جاذبية؟ تلاقيه كان شارب ربع حشيش كان واخده هدية من سواق تاكسي كان راكب معاة لما جه بشقر على الهرم في ستة اكتوبر، ميعرفش ان الحتة دي كانت جر رجل و بعد كدة هيدوله حشيش مغشوش.

اصل كل حاجة بقت مغشوشة في البلد دي. تيجي تشتري اتنين فول وواحد طعمية، تلاقبه جابلك تلاتة بطاطس، و لما تعترض يقوللك يا عم كل و خلاص اه و الله، تروح انت واكل زي الفل و تتكتم. هو انا كنت بتكلم عن ايه اصلا؟ ................ اه مكتبة الاشرف، رحت هناك بقى يا عم لقيت معندوش ورق انجليزي، طب اجيبة منين و النبي يا كبتن، يقوللك معرفش و بعدين تلاقيه عند المكتبة اللي قدامة بالظبط. المكتبة دي بقى كانت لسة فاتحة جديد نوفي ، و الطلبة كانوا عليها امم مش عارف ليه.

بمناسبة حكاية الطلبة اللي امم دول، تلاقي يا اخويا محلات كتيرة فتحت السنادي حوالين الكلية، دشليون مكتبة و عشرتاشر محل قهوة و كابوتشينو و فرابتشينو و نسكافية و قهوة تاني و ملك شيك و شوكولاتة سخنة في عز الحر. محدش بيبيع شاي خالص، و انا اصلا مبحبش الشاي، بس احيانا بكون قاعد على قهوة، و بعدين اطلب شاي معرفش ليه. تقريبا لان مينفعش اطلب شيشة بس. الشيشة دي بقى حاجة جامدة جدا، تشد النفس من دول تلاقيه مطلع دخان قد كدة. و بعدين اصل مفيش دخان من غير نار، و المتعاص بيعوص غيره، و اللي مبيتعاصشي بيتلط.

هو يعني ايه بيتلط؟ دايما بتكسف اسال. و انا في اولى اعدادي، كنت لما بقول لبابا ان انا مكسوف اسال على حاجة، يقوللي عيب عليك وانت قد البغل كده تتكسف. دلوقت بقيت مبتكسفش خالص، ممكن يكون الموضوع وصل عندي لحد الوقاحة. اللي وقح بجد بقى دكتور الاقتصاد، بس بيقولوا هيجيبلنا امتحان سهل. ربنا يستر.

نرجع مرجوعنا، بعد ما جبت الورق روحت البيت بالاوتوبيس المرادي، و روحت رامي الورق على المكتب و دخلت انام. لما اصحى ابقى اذاكر بقى. هو الامتحان كان يوم ايه؟ استنى لما ابص في الكالندر........... اه يوم 25، طب الساعة كام بقى؟؟؟؟؟ لازم افتكر اتصل بالواد عمرو اساله. سلام دلوقت بقى عشان عاوز انام و بعدين انت رغاي اوي و بتتكل كتير و مش هتخليني انام

القهوة





اهلا بيك ف القهوة. ادخل متتكسفش، دي القعدة لسة هتبتدي و المشاريب ببلاش.

في القهوة هتسمع كل حاجة، راجل عجوز بيكلم في السياسة ، او شاب صغير بيتكلم في الرياضة. هتلاقي عيل صغير بيكلم اصحابه عن اخر فيديو جيم، و هتلاقي واحدة بتكلم صاحبتها عن البلوزة اللي اشترتها امبارح.

ايوة، هتلاقي بنات في القهوة. المكان راقي بالرغم من اسمه، و مناسب لجميع الاعمار و الاجناس.

القهوة على طول مفتوحة، عمرك م هتيجي و نقوللك لا. مش عاوزينك تقلق، دايما هتلاقي مكان. عاوزينك بس ترتاح في الكرسي و تطلب زي ما انت عاوز.

في القهوة كل الناس اصحاب، محدش بيحرج حد حتى لو اعترض على وجهة نظره.

انا عارف انك لسة جديد، و انا مش اقدم منك ولا حاجة، صدقني هتحب الجو، في القهوة كله صاحب مكان.

ادخل متتكسفش، دي القعدة هتحلو و المشاريب على طول ببلاش