القهوة


اهلا بيك ف القهوة. ادخل متتكسفش، دي القعدة لسة هتبتدي و المشاريب ببلاش. في القهوة هتسمع كل حاجة، راجل عجوز بيكلم في السياسة ، او شاب صغير بيتكلم في الرياضة. هتلاقي عيل صغير بيكلم اصحابه عن اخر فيديو جيم، و هتلاقي واحدة بتكلم صاحبتها عن البلوزة اللي اشترتها امبارح. ايوة، هتلاقي بنات في القهوة. المكان راقي بالرغم من اسمه، و مناسب لجميع الاعمار و الاجناس. القهوة على طول مفتوحة، عمرك م هتيجي و نقوللك لا. مش عاوزينك تقلق، دايما هتلاقي مكان. عاوزينك بس ترتاح في الكرسي و تطلب زي ما انت عاوز. في القهوة كل الناس اصحاب، محدش بيحرج حد حتى لو اعترض على وجهة نظره. انا عارف انك لسة جديد، و انا مش اقدم منك ولا حاجة، صدقني هتحب الجو، في القهوة كله صاحب مكان. ادخل متتكسفش، دي القعدة هتحلو و المشاريب على طول ببلاش
.

Sunday, February 28, 2010

هتفرحوا امتى؟!!!



بيقولوا المصريين ولاد نكتة، المفروض ان احنا احسن ناس نهرج.

انا شخصيا مش شايف كده خالص. في رايي احنا حتى مش بنعرف نفرح.


انا فاكر لما نجحت في الاعدادية، امي فرحت قوي، لكن في وسط فرحتها قالتلي"عقبال ما تاخد الثانوية" و لما ربنا كرمني و جبت مجموع كويس في تانية ثانوي، لقيت حد يقولي "عقبال ما تدخل الكلية" الحمد لله دخلت الكلية، لكن بدل ما الناس تفرحلي، لقيتهم بيقولولي "عقبال الشهادة الكبيرة" على اساس ان الثانوية العامة دي شهادة صغيرة؟!!


طبعا السيناريو بيستمر. عندك واحد لحمد لله خلص الكلية بتقدير عالي، لاقي حد طالع يقوله "عقبال ما نشوفك في بيت العدل" و لما يتجوز "عقبال ما نفرح بولادك" و هكذا دواليك.دايما محدش بيفرح بحاجة انت عملتها، على طول تلاقي حد يفكرك بالحاجة اللي انت لسة معملتهاش.


لا و يا سلام لو والدك زي ابويا الحاج عاملك وصلة احباط."بابا، انا بقيت امين اتحاد طلبة الادارة" " اتحاد طلبة مين بس، روح ذاكرلك كلمتين يمكن تفلح""بابا، انا جبت 93% " "93% يا ابن الكلب !!!!! دول تدخل بيهم ايه دول؟ الحمام؟ "


ابوك مش كده؟ طب و الست الوالدة ؟ ايه اخبارها ؟ عمرك ما سمعت واحدة بتقول لابنها "يابني نفسي افرح بيك قبل ما اموت" و تلاقي الواد يا عيني متخرج من الكلية بتقدير امتياز، و بيشتغل بمرتب دشيليون جنيه في الشهر. لكن الست الوالدة مش شايفة اي حاجة من دي تستاهل انها تفرح بيه. كل الحاجات اللي عملها في حياته مفيهاش حاجة تفرحها.


قاعد على القهوة بيشيش و اخر تمام، لقى واحد صاحبه بقاله عشرين سنة مشافهوش." ازيك يا اسماعيل، ايه الاخبار؟" " الحمد لله، اتجوزت و خلفت، و الحمد لله جوزت العيال كلهم. حتى البت الصغيرة ، فرحها كان الاسبوع اللي فات" طبعا صاحبنا ملقاش حاجة يرد بيها، راح قايلله "عقبال ما نمشي في جنازتك انشاء الله "

Friday, February 26, 2010

القهوة ع الفيس بوك


في يوم 26 - 2 - 2010 و في حضور السادة احمد عادل الفقي و محمد ابو سنة تم بحمد الله افتتاح الفرع الجديد للقهوة على الموقع الاشهر فيس بوك. و على الراغبين في تفقد هذا الفرع، التوجه الى الرابط ادناه
و انا من هذا المكان اوجه الشكر الى السادة المذكورين اعلاه لمساعدتهم في تحقيق هذا الانجاز.
حيث قام السيد احمد بتصميم اللوجو المستخدم في الفرع( بس مش حلو اوي يعني)
وكذلك السيد محمد لسماحه لنا باستخدام لابتوبه .
و اوجه الشكر كذلك لكافيه سافانا، لسماحه باستخدام الانترنت اللاسلكي تبعه
ملحوظة: اثناء صياغة هذا الاعلان اعترض السيد احمد الفقي على بعض ما ذكر، لذا وجب على ان اقول.............. مش عاجبك، اخبط دماغك في الحيط !!

Wednesday, February 24, 2010

شعور بالوحدة

كانت تجلس وحيدة.......القاعة تملؤها الطاولات التي يتناثر عليها أشخاص عديدين أنا منهم.
لم تكن وحدتها هي ما أثار انتباهي و قد جلس الكثيرون وحدهم إلى طاولاتهم. لكن نظرة عينيها و اختلاجة فمها، حركة أصابعها اللا إرادية و تفقدها لهاتفها المحمول عدة مرات في الدقيقة الواحدة. كلها أشياء جذبت انتباهي.
لم يكن من عادتي التحديق، إلا أنني لم استطع أبعاد نظري عنها. هل ترونها معي؟ شعرها الأسود الذي يحد وجهها بهدوء، عيناها السوداوتين الحالمتين ووجهها الأبيض النقي، ملابسها التي توحي بالرقي و حسن الذوق. كانت لوحة متكاملة للجمال و الحب............ و الوحدة، كانت امرأة مميزة.

تكرر هذا المشهد كثيرا على مدار شهر كامل كنت أراها فيه يوميا. تجلس إلى نفس الطاولة و تتناول نفس فنجان القهوة السادة. نفس الترقب، نفس الانفعالات.
أخيرا، قررت أن أتحدث معها و اعرف قصتها. نهضت من مقعدي و اتجهت إليها. لم ادر ماذا افعل أو كيف أبدا حديثي. تزايد توتري و تسارعت ضربات قلبي كما لو كنت مقبل على مخاطرة غير محسوبة العواقب. و صلت إلى حيث تجلس، و بدون أن اشعر تجاوزتها و تابعت المشي في طريقي إلى الخروج. نعم، خانتني شجاعتي في اللحظة الأخيرة. وقفت قبل خروجي لإلقاء نظرة أخيرة عليها قبل أن أغادر بلا عودة، ولمفاجأتي وجدتها تبادلني النظر.

للمرة الأولى تلاقت عينانا، للمرة الأولى بعد شهر كامل من تحديقي فيها. رأيت في عينيها حزن و الم شديدين، إلا أنني رأيت بعض الأمل و الرغبة في الخلاص كذلك، لذا قررت العودة. قررت أن اجلس بجانبها، أن أتحدث معها، أن أقرا أفكارها و أن المس روحها. في عقلي رايتها متسمة و قد عمتها الفرحة لعثورها على شخص تتحدث معه أخيرا. لكن و أنا موشك على العودة إليها وجدتها تغادر. إنها تنهض و تلقي إلي بنظرة قصيرة قبل أن تستدير و تغادر المكان من باب آخر. و بينما هي تبتعد و تتوارى وسط زحام الشارع، كانت أحاسيسي قد تغيرت. الآن أصبحت اشعر.......بالوحدة.

Friday, February 19, 2010

انفجار




ماذا يحدث؟! لماذا لا يستطيع التركيز؟! اخذ يسأل نفسه مرات و مرات، لكن بلا اجابة.

هل نضب نبع الفكر؟ كم كان غبيا عندما اتخذ من الكتابة حرفة و مصدرا اساسيا للدخل. منذ شهر كامل لم يكتب و لو نصا واحدا، و الان لا يجد ما ياكله.

اخذ يعصر راسه بحثا عن افكار، لكن بلا فائدة.

تناول القلم ووضع السن على الصفحة البيضاء لعله يجد فكرة ما.

تصاعد في راسه الشعور بالفشل، ازداد شعوره بالصداع و عدم التركيز.

و فجأة، اتت الفكرة الى راسه فبدأ يكتب.............


العثور على جثة كاتب شاب

كتب ........


في صباح يوم الاربعاء الموافق .............. تم العثور على جثة الكاتب.................. في منزله بالقاهرة و قد انفجر راسه تماما. و قد عثر رجال الشرطة بجانب الجثة على ورقة بيضاء مكتوب عليها

لم استطع التعبير، لذا انفجرت

هذا وقد صرح اللواء..........................................

Wednesday, February 17, 2010

تهنئة


تحتفل الصديقة العزيزة سارة درويش (سمو الاميرة سارة) في هذه الايام بالعيد القومي الثاني لمملكة اللسعان الخاصة بها (مدونة بنوتة لاسعة) لذا فقد وجب علي تهنئتها بهذه المناسبة.


مبروك يا سارة العيد القومي التاني، يارب تفضلي لاسعة على طول و نشوفك في السراية الصفرا

عنوان المدونة : http://bntlas3a.blogspot.com/

Tuesday, February 9, 2010

rest in peace




مش عارف ليه اليومين دول بفكر في الموت. يا ترى ايه اللي هيحصل لحاجتي بعد ما اموت؟! بفكر اكتب وصية، بس الناس هتتريق عليا. معتز هيقول" انت عندك كام سنة يا عبيط انت علشان تكنب وصية؟"

انا مش قلقان على الحاجات اللي على الكومبيوتر، الحاجات دي انا تعبت فيها جدا، بس انا اتفقت مع معتز ان اللي يموت الاول يسيب الكومبيوتر بتاعه للتاني، هو اكيد فاكرني بهزر ، بس لما اموت هيعرف اني بتكلم بجد.


ياترى ايه اللي هيحصل للكتب؟ مش عاوزهم يفضلوا محطوطين على الرفوف لحد ما التراب يا كلهم، و اكيد مش عاوزهم يتباعوا بالكيلو. ممكن اسيبهم لقرايبي، بس مفيش فيهم حد مهتم بالقراءة اوي. اغلب الظن هسيبهم لاصدقاء الصالون، هما اللي هيقدروا قيمتهم. كتب الفلسفة لجلال، بيحب هو الحاجات المعقدة اللي تجيب صداع.


الوكيل ممكن يحب الترجمات، عندي ترجمات لديكنز و شيكسبير و تولستوي و غيرهم كتير.


امى بقي الكتب الانجليزي، فاكيد يسري هيحبها قوي. دايما بيقول انه عاوز يقرا انجليزي. ممكن برضوا بسنت تكون مهتمة بالكتب الانجليزي بحكم التخصص.

الروايات و المجموعات القصصية هسيبها ع المشاع، اللي عاوز حاجة ياخدها.


مش عاوز حد يزعل عليا لما اموت لاني مش هزعل على حد، مش عاوز تلات ايام عزاء و لا اربعين و لا ذكرى سنوية، ادفنوني و كملوا حياتكم ولا كاني جيت.


مش عاوز اندفن في الترب زي باقي الناس، عاوز اندفن في جنينة جميلة الناس متبقاش متشائمة وهي جاية تزورها. عاوز اندفن على طريقة الامريكان، حفرة في الارض ترموني فيها، و تحطوا شاهد عليه اسمي و تاريخ الوفاة. يا سلام لو يبقى مكتوب عليه " مسامحينك على كمية الوقاحة اللي طلعت منك، عارفين انك كنت بتهزر"


مش عاوز حد يلبس اسود و هو جاي يزوني، البسوا احمر، طول عمري بحب اللون الاحمر.و اللي يجي يزورني لازم يجيب معاه ورد ، انا بحب الورد قوي.


عاوز بعد ما اموت يتاخد مني كل الاعضاء اللي ممكن تنفع حد تاني. الكليتين و الكبد و القلب و قرنية العين و حتى الجلد. الحاجات دي حتي لو اتباعت في السوق السودا ممكن تنقذ حياة واحد ميستاهلش انه يموت.


انا مش متشائم، انا بس ببص بعيد اوي في المستقبل، او يمكن قريب قوي، مين عارف



مستوحاة من تدوينة "لما الشتا يدق الببان" لرحاب بسام، مدونة حواديت

قررت اعيش




بقالنا اكنر من سنة متكلمناش، بس عمرك ما بعدتي عن تفكيري. قد ايه كنت غبي لما عاملتك زي باقي اصحابي. كنت بحاول اقنع نفسي اننا

مجرد اصحاب و ان الموضوع ميتعداش شوية محادثات ع النت. لكن لما سيبتيني اتاكدت اني بحبك، بحبك قوي ، بحبك جدا.


تعرفي؟ انتي خليتيني افقد الثقة في كل البنات. خليتيني ابقى متاكد ان البنات كلهم كدابين و هيسيبوني في وقت انا محتاجلهم اكنر من اي حد تاني. لكن بالرغم من كده مش عارف اكرهك.


مش قادر افتكر حاجة وحشة قولتيها او عملتيها. مش عارف الاقي فيكي عيب غير انك محبيتينيش.

كانت غلطة عمري لما قررت اقابلك و نروح مع بعض، كان لازم اروح لوحدي زي ما كنت ناوي. لو ما كنتش شوفتك ما كنتش حبيتك اوي كده. دمرتي اتزاني النفسي و خليتيني فاضي من جوه.


بس تعرفي؟ انا مسامحك. مسامحك لانك متستاهليش اني ازعل منك، مسامحك لاني قررت اشوف الجانب الايجابي للتجربة


مسامحك لاني - و بعد اكتر من سنة - قررت اني اعيش


بس يا ترى انتي مسامحة نفسك ؟

شعور بالراحة

لازم اروح دلوقت حالا. انا عارف الشعور ده، و دايما مش يقدر اتحكم فيه. الحل الوحيد في البيت.
سيبت اصحابي و مشيت باقصى سرعة ممكن امشي بيها من غير ما انفجر، المشكلة اني مش معايا فلوس اركب تاكسي، و اقرب اتوبيس مش قريب اوي يعني.

انا خلاص ، مش قادر، فاضل ثانية و افرقع. لقيت اتوبيس بيهدي علشان المطب رحت ناطط فيه. عاوز اصرخ بس الناس هيقولوا عليا مجنون. يوصل الاتوبيس اروح نازل بسرعة و امشي في اتجاه البيت. ينده عليا واحد صاحبي و مردش عليه. اكيد هيزعل بس هعرف اصالحه، المهم اوصل البيت الاول و بعدين ربنا يسهل.

اوصل البيت و اطلع السلم. فين المفتاح؟! المفتاح راح فين؟ اه اهوه. فتحت الباب و طلعت اجري حتى من غير ما اقفله ورايا.

الحمام........... لازم ادخل الحمام. اكيد اللي اخترع التواليت خد جايزة نوبل ، لان التواليت ده اختراع عبقري. بس لا، الحمام ممكن يستنى، المهم اوصل للكومبيوتر. قالولي هيردوا عليا الساعة 2 و دلوقت بقت 2 و ربع. اكيد الايميل وصل.

اهوه، الاميل اهوه. يا سلااااااااااااااام. لقيت الايميل و الجواب بالموافقة. عمري ما ارتحت كده ابدا، لا لسة الراحة مكملتش، لازم ادخل الحمام بقى.




مستوحاة من تعليقات للاصدقاء محمد الوكيل و احمد الفقي

Wednesday, February 3, 2010

الموبايل على ودنه و السيجارة في بقه

الموضة اللي ماشية اليومين دول في العالم هي اضرار المحمول. العلماء شغالين خناق و ضرب في بعض عشان الموضوع ده. واحد يقولك المحمول مش ضار خالص و التاني يقولك ان الاولاني حمار و ان المحمول ضار اخر حاجة.

الجديد في الموضوع ده بقى ان المحمول بياثر على الفص الشمال في المخ بس، و لان الفص الشمال ده فيه مركز الكلام، العلماء بينصحوك بانك تحط الموبايل على ودنك اليمين. انا شخصيا شايف ان كل ده كلام في الهوا، اللي بيتقال على المحمول اتقال قبل كده عن التليفزيون و الراديو و التلاجة و التكييف. و حتى لو الاجهزة دي ثبت ضررها، حد يعرف يعيش من غير تلاجة ؟!!!! ـ

بس فيه ناس بقى شايفة ان احنا نعرف نعيش من غير موبايل، ووصل بيهم الامر لدرجة ان هما عاوزين يحطوا على الموبايلات صورة زي اللي على علب السجاير، الموبايل ضار اخر حاجة و هيخليك تموت جدا.

بمناسبة السجاير، شفت الصورة الجديدة اللي على العلبة؟ اكيد شفتها يعني حتى لو انت مش مدخن! ايه؟ مشفتهاش والله؟ ماشي يا عم، هاخدك على قد عقلك و اصدقك.

العلب اليومين دول عليها صورة سيجارة معووجة و كاتبين جنبها ان التدخين لفترة طويلة يؤثر على العلاقة الزوجية!!!!!!!!!! يعني هو التدخين بيؤثر على العلاقة الزوجية بس ؟ يعني لو واحد ماشي في الحرام، سيجارته مش هتتعوج؟

و بعدين افرض ان اللي بيدخن السجاير دي ست مش راجل، المفروض ان صورة السيجارة المعووجة تخوفها ليه؟! الصراحة انا شايف ان الصورة دي اغبى صورة اتحطت من ساعة ما ابتدوا موضوع الصور ده. على الاقل الصورة بتاعت الست الحامل خلتني انا شخصيا مشربش سجاير قدام العيال الصغيرة علشان لما يجيلهم تخلف عقلي من التعليم الحكومي بتاعنا ، محدش يلزقها فيا و يقوللي ان دخان سيجارتي هو السبب. انما الصورة الجديدة دي خلتني اضحك انا و اصحابي لحد ما عنينا دمعت.

و الله كله كلام فارغ، تخيل انك رايح لواحد ميكانيكي و للا جزار تقولله ان الموبايل هيخليه اخرس و ان الدخان هيخلي سيجارته تتعوج و علاقته الزوجية تبوظ، اكيد هيرد عليك يقوللك، يا عم دي اشتغالات عملاها الحكومة علشان تغلي الاسعار، و بعديت يروح مولع السيجارة و مطلع الموبايل و هاتك يا كلام مفعم بالدخان عندا في الحكومة.

و صباح الفل