القهوة


اهلا بيك ف القهوة. ادخل متتكسفش، دي القعدة لسة هتبتدي و المشاريب ببلاش. في القهوة هتسمع كل حاجة، راجل عجوز بيكلم في السياسة ، او شاب صغير بيتكلم في الرياضة. هتلاقي عيل صغير بيكلم اصحابه عن اخر فيديو جيم، و هتلاقي واحدة بتكلم صاحبتها عن البلوزة اللي اشترتها امبارح. ايوة، هتلاقي بنات في القهوة. المكان راقي بالرغم من اسمه، و مناسب لجميع الاعمار و الاجناس. القهوة على طول مفتوحة، عمرك م هتيجي و نقوللك لا. مش عاوزينك تقلق، دايما هتلاقي مكان. عاوزينك بس ترتاح في الكرسي و تطلب زي ما انت عاوز. في القهوة كل الناس اصحاب، محدش بيحرج حد حتى لو اعترض على وجهة نظره. انا عارف انك لسة جديد، و انا مش اقدم منك ولا حاجة، صدقني هتحب الجو، في القهوة كله صاحب مكان. ادخل متتكسفش، دي القعدة هتحلو و المشاريب على طول ببلاش
.

Monday, June 21, 2010

شعور بالحيرة




منذ ان ظهرت في حياتي و انا اعلم انها مميزة. منذ ان ظهرت في حياتي و انا لا ارى احدا سواها. لم اكن اؤمن بالحب من اول نظرة، الحقيقة انني لم اكن بالحب اطلاقا. لكن رؤيتها اطلقت في نفسي فيضا من المشاعر لم اعهده من قبل، هل هذا هو الحب؟

المشكلة ان ظهورها في حياتي جاء متزامنا مع زواج اعز اصدقائي، مما جعلني افكر، هل ما اشعر به هو الحب حقا؟ ام انه شعور ناتج عن الغيرة؟ هل تعلقي بها جاء بسبب غيرتي من صديقي الذي وجد المراة التي تقبل ان تقضي عمرها معه فتزوجها و تركني وحدي؟

هل انا احبها حقا؟ ام ان حبي لها هو مجرد محاولة من عقلي الباطن لتقليل شعوري بالوحدة؟ فالنفترض انني احبها حقا، هل تبادلني الحب؟ بالطبع لا، فهي لا تعلم من انا. المضحك في الامر هو انني لا اعرف من هي ايضا، كل ما اعلمه عنها هو انها زميلتي في العمل لا اكثر، لست حتى اعلم ما اسمها.

ترى كيف سيكون حال اذا صارحتها بحبي و رفضته؟ و الالعن، كيف سيكون حال اذا بادلتني الحب و انا الذي- حتى رايتها- كنت اكره النساء؟

يا الهي.....تكاد تقتلني الحيرة و انا عاجز عن التوقف عن التفكير....ماذا افعل؟ هل اصارحها بحبي وليكن ما يكون؟ هل انتظر حتى اتاكد ان ما اشعر به هو الحب اصلا؟ ام اتجاهل ما اشعر به ايا كان و اضى قدما بحياتي كما كنت قبل رؤيتها؟


لست ادري !!



انا جيييييييييت


السادة القراء المحترمين، اعتبارا من الخميس القادم انشاء الله ساكون قد انتهيت رسميا من اداء الخدمة الامتحانية الاجبارية، افرحوا بقى هيييييييييه





اما بانسبة للامتحانات، فهي كانت سهلة نسبيا، و ده بيخليني اسأل" هو انا سقطت ليه؟"

مهو يا اما المناهج بقت اسهل ، يا اما انا كنت بغل السنة اللي فاتت، و ممكن السببين مع بعض

المهم ان انا الحمد لله خلصت، و ياريت يكونوا الخمسة اللي بيقروا المدونة صبروا عليا و ممشيوش

Sunday, May 30, 2010

بيان رسمي


السادة القراء المحترمين، ده لو فيه قراء اصلا، مش عارف ليه حاسس ان انا الوحيد اللي بدخل على المدونة دي.
المهم
السادة القراء المحترمين
تحية طيبة و بعد:
نظرا لان الامتحانات بعيد عنكوا ع الابواب، لذا قرر المدون اللي هو حضرتي (ايوه حضرتي حد عندو مانع؟.) غلق المدونة مؤقتا حتى الاتهاء من الخدمة الامتحانية الاجبارية. مش عارف ليه مصرين يمتحنونا كل سنة؟ اشمعنى الريس بينتخبوه كل ست سنين؟ خلاص معادش فيه ثقة في الشباب؟
الصراحة هو انا مبتفرقش معايا امتحانات ولا اي ابن لذين، بس الفكرة ان الريسيفر بتاع الوحي بتاعي بايظ و عاوز كامة علشان تظبط مشاكل الارسال، و انا مش معايا فلوس اجيب كامة ولا حتى مستعملة.
وبعدين اصل السجاير غليت و انا الصراحة افصل احوش لعلبة سجاير عن اني احوش لكامة ريسيفر
المهم، مشيها ان الامتحانات هي المشكلة، و خلي حكاية الريسيفر دي في سرك. و اوعى تقول لابويا ان انا بشرب سجاير لانه ممكن يكبسك و يقولك ان هو عارف
اشكركم على حسن الاستماع و القاكم لما السجاير ترخص............ قصدي لما الامتحانات تخلص

Thursday, May 20, 2010

no title

since the blog's facebook page is proven to be completely useless, i have decided to delete it
and i hereby inform all the readers and the facebook fans that i just deleted alahwa's facebook page and i will not open a new one anytime soon



thank you

the blogger

Saturday, May 15, 2010

تهنئة




يحتفل الصديقان سارة دروش و شريف شقارية هذا الاربعاء بصدور كتابي زوجي مازال حبيبي و موس حلاقة.
.لذا وجب علي تقديم التهاني بهذه المناسبة
كما يدعوكم المدون " اللي هو حضرتي" لحضور حفل التوقيع.
الذي سيكون في كافيه روستيك - شارع الفاتح بجوار سوق الجملة بطنطا
لينك الايفنت ع الفيس
http://www.facebook.com/event.php?eid=119934918036223

مبروك يا شريف و يا سارة على الكتب و عقبال ما تاخدوا جايزة نوبل و تسلفوني نصها

Tuesday, April 20, 2010

صباح جميل




تقول امي انه صباح جميل. صراحة لست ارى الفرق بين صباح و آخر. و هل هناك صباح قبيح؟! كلها تتشابه في نظري. ما ان تشرق الشمس حتى تكتظ الشوارع بالموظفين و الطلبة، يحترقون تحت شمس النهار الملتهبة و يستنشقون هواء المدينة الملوث، لا يهمهم اذا كان الصباح جميلا ام لا.


تقول امي انه صباح جميل......تنصحني ان اخرج الى الشارع بدلا من قضاء اليوم في غرفتي قليلة الاضاءة سيئة التهوية امام حاسوبي الذي يوشك على الانهيار. انهض من الفراش و افتح الحاسوب في تجاهل تام لنصيحة امي. هذه الغرفة قليلة الاضاءة سيئة التهوية هي عالمي الخاص، و هذا الحاسوب الموشك على الانهيار هو وسيلتي الوحيدة للتواصل مع العوالم الاخرى.


تقول امي انه صباح جميل...... القي نظرة على الافطار الذي اعدته فلا يعجبني. اسالها عن ابي فتقول انه غادر مبكرا. ترى اين ذهب؟ ابي نادرا ما يعمل هذه الايام نظرا لكبر سنه، و ليس من عادته الخروج مبكرا. اسالها اين ذهب... فلا تجيب.


تقول امي انه صباح جميل....... ثخبرني انها مغادرة للعمل. اتجاهلها و اتناول الافطار بغير رضا. ترتدي امي الساعة و النظارة و الحذاء ثم تغادر. اقف للحظة في سكون محدقا في الباب....................ثم اعود للفراش لانام حتى تعود.


Sunday, April 18, 2010

في القطار


كانت المرة الاولى التي اسافر فيها بالقطار وحدي. عادة ما افضل السفر بالحافلة عندما اكون وحيدا، لكن في هذا اليوم قررت التغيير بلا سبب واضح.
في القطار جلست في مقعدي و اخرجت الكتاب الذي قررت قراءته لتزجية الوقت، عادة ما اقرا الكتب الانجليزية لمجرد التظاهر بالثقافة من مبدا " ابتعدواعني ايها الجهلة فانا اقرا لانجليزية" لذا لم يكن من المنطقي ان اختار كتابا انجليزيا لمجرد الاستمتاع، لكن عنوان "لماذا يقع الرجال في حب العاهرات" هو عنوان جدير بجذب الانتباه.
استغرقني الكتاب فلم اشعر ان المقعد بجواري لم يعد خاليا الا بعد ما يقرب من منتصف المسافة. كنت قد تعبت من القراءة، لذا قررت ان ارتاح قليلا، و لمفاجاتي وجدتها بجواري.
فتاة لا يمكن الا ان تكون في العشرينات من عمرها. اختارت المقعد المجاور لي دونا عن بقية المقاعد الخالية في عربة القطار. لابد انها اعجبت بي حتى تختار الجلوس بجواري بدلا من هذه السيدة العجوز في الامام. كلا......لابد وانها قررت الالتزام ةبالرقم المدون في التذكرة وليكن ما يكون.
كانت تحدق في اللا مكان. هل تنظر الى المستقبل؟ ام هي تسترجع ذكريات الماضي؟ ربما تفكر في الانتحار....او حتى تحاول ان تقرر ماذا ستتناول على العشاء.
ادركت انني اطلت النظر لذا عدت لكتابي، لكني لم استظع التركيز. بعد عشر صفحات من المحاولة قررت ترك الكتاب و مشاهدة المناظر الطبيعية من النافذة. رايتها في الزجاج تنظر لي......تجاهلتها.....اطالت النظر.
ترى ما اسمها؟....لا تبدو مثل داليا او ميار.......ربما اية؟....لا ..لابد ان اسمها فريدة!
هل هي طالبة؟ هل تعمل؟ لم استطع الاستنتاج.
ترى هل هي مسافرة ام عائدة؟ ماذا يدور براسها؟.......لماذا تحدق في هكذا؟ انها تثير ارتباكي.......هل ستمد الى جسور التواصل؟ ربما تفكر في قتلي او سرقة امتعتي
لا..... لا يدو عليها الاجرام. ماذا لو كانت تفكر مثلي؟ ماذا لو كانت تحاول ان تقرا ما يدور براسي؟
كلا.....لابد ان لها ابا مريضا، لابد انها تفكر في اباها المريض
البيت.....الطبيب.....المستشفى......غرفة العمليات......المشرحة.......مراسم الجنازة و الدفن......ثم القطار مرة اخرى
نعم هذا صحيح، لابد انها تفكر في حالها بعد وفاة والدها، لابد ان هذا هو سبب صمتها.
لكني اكره ان اتخيلها ترتدي السواد، اللون الاسود لن يبدو جيدا عليها. لابد ان هذه النظرية خاطئة.
اذا هي طالبة جامعية في طريقها الى المنزل بعد يوم طويل في الكلية. اعرف الكثيرين من الناس يدرسون في مدن غير التي يعيشون فيها. ربما هي عائدة من امتحان؟
لابد انه كان صعبا هذا الامتحان. ربما لم تكن مستعدة جيدا و لم تستطع الحل، اذا هذا هو سبب صمتها، تتوقع الفشل و تتمنى النجاح. اراهن انها تخاطب اللله سرا الان. يارب ساعدني، لم اكن اتوقع ان يكون الامتحان بهذه الصعوبة.
لا يصح ان اقاطع اتصالها بالله، اذا فلاغلق عيناي و استسلم للنعاس قليلا ريثما يصل القطار الى وجهته.
استيقظت على صوت المذيع الداخلي للمحطة معلنا وصول القطار الى الرصيف، لم اجدها بجواري.
ترى هل اسرعت الى الباب؟ هل كانت متعجلة للخروج من سجن القطار الى حرية المحطة؟
ام لم تكن موجودة اصلا؟ هل كانت من نسج خيالي؟
لن اعرف ابدا

Friday, April 16, 2010

قصص




هناك قصص تعشقها و قصص تكرهها، هناك قصص تحملك الى نعيم الجنة و قصص تلقي بك في زنازين الجحيم. هناك قصص تنقلك الى اعالي البحار و قصص تنقلك الى قلوب الصحارى......... هناك من القصص الممتع و الممل.. الواقعي و الخيالي...الحزين و البهيج.



ثم هناك قصتي.... قصتي ليس لها مثيل. قصتي اروع ما يمكن ان يكتب او يقص. قصتي ستجعلك تبكي فرحا، و ستجعلك تضحك من شدة الحزن..... قصتي ستريك النعيم في قلب الجحيم، و ستسير بسفينتك في قلب الصحراء.


لكن القصة مازالت لم تقص. مازالت القصة محبوسة في مكان ما داخل خلايا عقلي الرمادية، و مازلت لا استطيع العثور عليها بعد سنين من البحث.


فهل تساعدني؟

Sunday, April 11, 2010

ابو الليف




منذ عدة ايام ، و في داخل حرم كليتي - كلية التجارة- قامت مظاهرة مناهضة لهدم الاقصى. كان الشباب المشاركين في المظاهرة يدعون الحكومات العربية لاتخاذ اعنف التدابير لوقف هذه المهزلة التي تحدث في فلسطين المحتلة. بعيدا عن المظاهرة و اسبابها و موقف حرس الجامعة منها، اريد ان اسلط الضوء على موقف الاغلبية العظمى من الطلبة من هذه المظاهرة.


قوبلت المظاهرة بالكثير من اللمبالاة و السخرية التى وصلت الى حد وضع فيديو للمظاهرة على الفيس بوك تحت عنوان" ولاد الهبلة"


الهذا الحد وصل مستوى اللامبالاة لدى الشباب تجاه القضية الفلسطينية؟ هل كل من يدعو الحكومة الي التحرك " ابن هبلة" ؟


دعني اعرض عليك ردود الافعال داخل شعبة اللغة و التي انا احد طلابها


هي المظاهرة اللي شغالة دي بتقول ايه؟


يا عم مظاهرة مين بلا وجع قلب، بص البت دي....بذمتك مش جامدة كيك؟


ياجدعان المظاهرة دي شكلها عن حاجة مهمة


عارف اية اللي مهم بجد، شريط ابوالليف ، الشريط ده جامد طحن. اسمع كده


هذه كانت امثلة لما يهتم به الشباب داخل الجامعات المصرية، يا عم بلا فلسطين بلا وجع قلب، شغلنا حاجة نسمعها..عندك ابو الليف؟. ولهذا فمازالت القضية ضائعة و الحقوق منسية . وبما ان المواطن العربي يفخر بانه " مش خرونج" و انه ربنا يحميه لاهله "كينج كونج" ..... اذا فليرضى بالتقسيم الاسرائيلي للمقدسات الدينية في القدس و الذي اهتم بجميع المقدسات وصولا الى حائط المبكى حيث اتفق على اقتسامه بالنصف بحيث تحتفظ اسرائيل بالحائط و يكتفي العرب بالبكاء

Monday, March 29, 2010

اصوات




اصوات خفية حبيبة، اصوات اولئك الذين ماتوا، او اولئك الذبن هم ضائعون مثل الموتى. تتكلم في احلامنا احيانا، و احيانا في الفكر يسمعها العقل.
و مع اصدائها تعود برهة اصوات من قصائد حياتنا الاولى مثل موسيقى بعيدة.........تخبو في ظلام الليل

Monday, March 22, 2010

شعور بالتمرد


الشباب هو عماد المستقبل....انتوا اللي هتصلحوا اخطاء الماضي و تجيبولنا مستقبل احسن...ثقب الاوزون...الانبعاثات الحرارية...
التغيرات المناخية...حيوانات مهددة بالانقراض...لابد ان يهتم الشباب بالقراءة و الفنون...ترميم الاثار


ما كل هذا الهراء؟! لماذا يجب على الشباب ان يكون عماد المستقبل؟ لماذا يجب ان نتحمل مسئولية اخطاء لم نرتكبها؟ لقرون افسد البشر كل شئ على هذا الكوكب، و الان يتوقع مني التاريخ ان انظف ما تركه الجميع من فوضى ؟! يجب علي ان اهتم باعادة التدوير و التنبه  لمستويات الكربون المنبعثة من سيارتي..يجب علي ان اتوقف عن استخدام الثلاجة و التكييف و كل منتجات البترول حتى لا الوث البيئة..يجب علي ان ادفع فاتورة التلوث النووي و دخان المصانع و اطنان من البترول تم استخدامها قبل ان اولد بجيل كامل...يجب علي ان اهتم بالاثار و ان اقوم بترميم كل ما يفسده الزمن و التلوث و ان احافظ على لغتي من الانقراض...ان اتحمل ليس فقط عبء الحياة في  عالم يحتضر، و لكن ابذل كل ما بوسعي لوقف عملية الاحتضار ايضا.... مطلوب مني ان اقوم بدور الرجل الذي يقلع عن التدخين بعد الاصابة بسرطان الرئة.

لكن هل سالني احد ماذا اريد؟! طبعا لا. انا اريد ان اصرخ بلااااااا...اريد ان اعلن انني لن اقبل بكل هذا وليذهب العالم الى الجحيم...اريد ان احرق ابار البترول و ان اقطع اشجار الغابات لاصنع منها ورقا اقوم بحرقه.....ارش غازات الفريون و اول اكسيد  الكربون في طبقة الاوزون مباشرة...اقتل كل الاسماك قبل ان يقتلها البترول و النفايات النووية التي سالقيها في كل المحيطات....اطلق الرصاص على كل حيوان مهدد بالانقراض...اهدم الاهرامات و المعابد الفرعونية و امحي برج بيزا من على وجه الارض بقنبلة نووية....اريد ان احرق متحف اللوفر و امسح مؤخرتي بالموناليزا...اريد ان اصنع تجويف في راس نفرتيتي لاطفئ فيه سجائري و اريد ان اسرق قناع توت عنخ امون لاتبول فيه وقتما شئت. هذا هو عالمي الان....و انا حر افعل به ما شئت

لكن للاسف ليس لدي الخيار، فانا مجرد ترس يضعه الكبار اينما يحلو لهم.

الشباب هم عبيد التاريخ و فضلات الماضي

فضفضة

ملحوظة: البوست دي ملهاش اي لازمة، انصحك متضيعش وقتك عليها

بقالي كام يوم حاسس بحزن مش طبيعي، و المشكلة اني مش عارف السبب. يمكن علشان مش لاقي سبب بزعل زيادة.
الزعل ده خلاني اقعد في البيت و مخرجش الا لظروف معينة و في حالات الطوارئ بس. المهم....و انا قاعد في البيت، و لاني معنديش نت ف انا طبعا مقدرتش افتح ايميلي او ادخل على الفيس بوك. و بعدين امي جرجرتني من قفايا امبارح علشان اروح فرح بنت خالي اللي انا اصلا معرفهاش، بغض النظر عن اني اصلا باكره الافراح، انا مكنتش عاوز اروح علشان مش لاقي سبب يخليني اقعد في مكان دوشة لدرجة تتعب الاعصاب و انا اصلا اعصابي تعبانة جدا، بس حاول بقي تفسر لامك انت ليه مش عاوز تخرج معاها في عيد الام!

المهم انا قولت اهي فرصة، اروح سايبر و افتح الميل و الفيس و اشوف ايه الاخبار. دخلت على الفيس، لقيت مفيش اي رسايل ولا نوتيفيكاشنز من اي حد من اصحابي. يعني بقالهم اسبوع محدش شاف خلقتي، و محدش دور عليا؟ طب محدش اتصل و قولت ماش، مفلسين و مش لاقيين ياكلوا ه يجيبوا رصيد منين، انما مفيش ايميل؟! و لا حتي وول بوست؟!

قد كده انا مش مهم؟ قد كده مليش لازمة؟....بجد يعني اعز اصحاب و الله

اللي رفع معنوياتي شوية ان انا- و قبل ما الغي الاكونت بتاعي على الفيس- لقيت بوستين على الوول من آخر اتنين كنت ممكن اتخيل ان هما ياخدوا بالهم ان انا مش موجود .

سارة نبيل و سارة درويش، اشكركم بجد لانكم افتكرتوني

Tuesday, March 9, 2010

the hurt locker


the hurt locker فيلم يستحق المشاهدة

Saturday, March 6, 2010

رجاء


افتقدك بشدة........................ارجوك ان تعود.

Thursday, March 4, 2010

هم العالم




we are the world 25 او نحن العالم 25، هي اغنية جمعت عددا كبيرا من فناني الغرب، هدفها هو جمع التبرعات من اجل هاييتي.

عندما شاهدت هذا الفيديو للمرة الاولى، شعرت بقدر كبير جدا من كراهية الذات، ليست ذاتي الشخصية بالطبع -فانا اتمتع بقدر لا باس به من النرجسية- و لكن ذاتي المصرية و انتمائي للعالم العربي. فها هم الفنانين الامريكان يجمعون التبرعات بالمليارات من اجل كارثة هايتي ، انطلاقا من شعورهم بالمسئولية المجتمعية تجاه العالم كله و ليس بلدهم و حسب.

ما جعلني اكره انتمائي هو مقارنة ما قام به النجوم الامريكان تجاه كارثة لم تحدث في بلادهم، بما قام به النجوم المصريين عندما حدثت كارثة السيول في اسوان و سيناء، التي هي من اهم المناطق السياحية التي يفتخر بها كل مصري. مقارنة حجم التبرعات التي جمعها تي باين و بلاك ايد بيز و كانيه وست الذين نعتبر اغانيهم هابطة و اسفاف فني، بالتبرعات التي لم يجمعها خالد سليم و حمادة هلال و مصطفى قمر، نجومنا الذين نعتز بهم و نعتبرهم احسن فناني الكون.


لم تكن هذا فقط هو سبب كراهيتي لذاتي، السبب الاخر هو رد فعل الحكومات العربية تجاه كارث هاييتي، و التي كانت مسرحا لاعنف زلزال عرفه العالم في التاريخ الحديث. حيث لم تقم الحكومات العربية باي رد فعل على الاطلاق. لا تبرعات مادية و لا معنوية و لا ارسال متطوعين للمساهمة في تخفيف الام الاف المصابين و الجرحى و المشردين


تجاهلت الحكومات العربية تماما هذه الكارثة و كان لم تكن، في حين تدفقت التبرعات من جميع انحاء العالم، سواء كانت الدول المرسلة غنية ام فقيرة. حتى اسرائيل قامت بارسال بعثة من الشباب المتطوعين للمساهمة في اعادة الاعمار.


عند النظر الى هذا الفيديو و حجم التبرعات التي ادى الى جمعها، و مقارنته بما فعله الفنانون المصرين تجاه ما حدث في اسوان ، او رد فعل الحكومات العربية تجاه كارثة هاييتي و تجاهلها تماما لدورها الانساني على المسرح الدولي. كلها اشياء جعلتني احتقر انتمائي للعالم العربي و اتمنى لو ولدت امريكيا.


هذا التجاهل هو ما جعل الغرب يتناسى وجود العالم العربي تماما، و اعطاه الشجاعة الكافية لاطلاق اسم (نحن العالم) على اغنيتهم التي لم يشارك فيها اي فنان عربي او حتى من اصل عربي.







Tuesday, March 2, 2010

بلا عنوان...................و بلا فائدة




عندما يصبح انتماء الشباب للمنتخب الوطني و ليس للوطن........فلا امل في الاصلاح

Sunday, February 28, 2010

هتفرحوا امتى؟!!!



بيقولوا المصريين ولاد نكتة، المفروض ان احنا احسن ناس نهرج.

انا شخصيا مش شايف كده خالص. في رايي احنا حتى مش بنعرف نفرح.


انا فاكر لما نجحت في الاعدادية، امي فرحت قوي، لكن في وسط فرحتها قالتلي"عقبال ما تاخد الثانوية" و لما ربنا كرمني و جبت مجموع كويس في تانية ثانوي، لقيت حد يقولي "عقبال ما تدخل الكلية" الحمد لله دخلت الكلية، لكن بدل ما الناس تفرحلي، لقيتهم بيقولولي "عقبال الشهادة الكبيرة" على اساس ان الثانوية العامة دي شهادة صغيرة؟!!


طبعا السيناريو بيستمر. عندك واحد لحمد لله خلص الكلية بتقدير عالي، لاقي حد طالع يقوله "عقبال ما نشوفك في بيت العدل" و لما يتجوز "عقبال ما نفرح بولادك" و هكذا دواليك.دايما محدش بيفرح بحاجة انت عملتها، على طول تلاقي حد يفكرك بالحاجة اللي انت لسة معملتهاش.


لا و يا سلام لو والدك زي ابويا الحاج عاملك وصلة احباط."بابا، انا بقيت امين اتحاد طلبة الادارة" " اتحاد طلبة مين بس، روح ذاكرلك كلمتين يمكن تفلح""بابا، انا جبت 93% " "93% يا ابن الكلب !!!!! دول تدخل بيهم ايه دول؟ الحمام؟ "


ابوك مش كده؟ طب و الست الوالدة ؟ ايه اخبارها ؟ عمرك ما سمعت واحدة بتقول لابنها "يابني نفسي افرح بيك قبل ما اموت" و تلاقي الواد يا عيني متخرج من الكلية بتقدير امتياز، و بيشتغل بمرتب دشيليون جنيه في الشهر. لكن الست الوالدة مش شايفة اي حاجة من دي تستاهل انها تفرح بيه. كل الحاجات اللي عملها في حياته مفيهاش حاجة تفرحها.


قاعد على القهوة بيشيش و اخر تمام، لقى واحد صاحبه بقاله عشرين سنة مشافهوش." ازيك يا اسماعيل، ايه الاخبار؟" " الحمد لله، اتجوزت و خلفت، و الحمد لله جوزت العيال كلهم. حتى البت الصغيرة ، فرحها كان الاسبوع اللي فات" طبعا صاحبنا ملقاش حاجة يرد بيها، راح قايلله "عقبال ما نمشي في جنازتك انشاء الله "

Friday, February 26, 2010

القهوة ع الفيس بوك


في يوم 26 - 2 - 2010 و في حضور السادة احمد عادل الفقي و محمد ابو سنة تم بحمد الله افتتاح الفرع الجديد للقهوة على الموقع الاشهر فيس بوك. و على الراغبين في تفقد هذا الفرع، التوجه الى الرابط ادناه
و انا من هذا المكان اوجه الشكر الى السادة المذكورين اعلاه لمساعدتهم في تحقيق هذا الانجاز.
حيث قام السيد احمد بتصميم اللوجو المستخدم في الفرع( بس مش حلو اوي يعني)
وكذلك السيد محمد لسماحه لنا باستخدام لابتوبه .
و اوجه الشكر كذلك لكافيه سافانا، لسماحه باستخدام الانترنت اللاسلكي تبعه
ملحوظة: اثناء صياغة هذا الاعلان اعترض السيد احمد الفقي على بعض ما ذكر، لذا وجب على ان اقول.............. مش عاجبك، اخبط دماغك في الحيط !!

Wednesday, February 24, 2010

شعور بالوحدة

كانت تجلس وحيدة.......القاعة تملؤها الطاولات التي يتناثر عليها أشخاص عديدين أنا منهم.
لم تكن وحدتها هي ما أثار انتباهي و قد جلس الكثيرون وحدهم إلى طاولاتهم. لكن نظرة عينيها و اختلاجة فمها، حركة أصابعها اللا إرادية و تفقدها لهاتفها المحمول عدة مرات في الدقيقة الواحدة. كلها أشياء جذبت انتباهي.
لم يكن من عادتي التحديق، إلا أنني لم استطع أبعاد نظري عنها. هل ترونها معي؟ شعرها الأسود الذي يحد وجهها بهدوء، عيناها السوداوتين الحالمتين ووجهها الأبيض النقي، ملابسها التي توحي بالرقي و حسن الذوق. كانت لوحة متكاملة للجمال و الحب............ و الوحدة، كانت امرأة مميزة.

تكرر هذا المشهد كثيرا على مدار شهر كامل كنت أراها فيه يوميا. تجلس إلى نفس الطاولة و تتناول نفس فنجان القهوة السادة. نفس الترقب، نفس الانفعالات.
أخيرا، قررت أن أتحدث معها و اعرف قصتها. نهضت من مقعدي و اتجهت إليها. لم ادر ماذا افعل أو كيف أبدا حديثي. تزايد توتري و تسارعت ضربات قلبي كما لو كنت مقبل على مخاطرة غير محسوبة العواقب. و صلت إلى حيث تجلس، و بدون أن اشعر تجاوزتها و تابعت المشي في طريقي إلى الخروج. نعم، خانتني شجاعتي في اللحظة الأخيرة. وقفت قبل خروجي لإلقاء نظرة أخيرة عليها قبل أن أغادر بلا عودة، ولمفاجأتي وجدتها تبادلني النظر.

للمرة الأولى تلاقت عينانا، للمرة الأولى بعد شهر كامل من تحديقي فيها. رأيت في عينيها حزن و الم شديدين، إلا أنني رأيت بعض الأمل و الرغبة في الخلاص كذلك، لذا قررت العودة. قررت أن اجلس بجانبها، أن أتحدث معها، أن أقرا أفكارها و أن المس روحها. في عقلي رايتها متسمة و قد عمتها الفرحة لعثورها على شخص تتحدث معه أخيرا. لكن و أنا موشك على العودة إليها وجدتها تغادر. إنها تنهض و تلقي إلي بنظرة قصيرة قبل أن تستدير و تغادر المكان من باب آخر. و بينما هي تبتعد و تتوارى وسط زحام الشارع، كانت أحاسيسي قد تغيرت. الآن أصبحت اشعر.......بالوحدة.

Friday, February 19, 2010

انفجار




ماذا يحدث؟! لماذا لا يستطيع التركيز؟! اخذ يسأل نفسه مرات و مرات، لكن بلا اجابة.

هل نضب نبع الفكر؟ كم كان غبيا عندما اتخذ من الكتابة حرفة و مصدرا اساسيا للدخل. منذ شهر كامل لم يكتب و لو نصا واحدا، و الان لا يجد ما ياكله.

اخذ يعصر راسه بحثا عن افكار، لكن بلا فائدة.

تناول القلم ووضع السن على الصفحة البيضاء لعله يجد فكرة ما.

تصاعد في راسه الشعور بالفشل، ازداد شعوره بالصداع و عدم التركيز.

و فجأة، اتت الفكرة الى راسه فبدأ يكتب.............


العثور على جثة كاتب شاب

كتب ........


في صباح يوم الاربعاء الموافق .............. تم العثور على جثة الكاتب.................. في منزله بالقاهرة و قد انفجر راسه تماما. و قد عثر رجال الشرطة بجانب الجثة على ورقة بيضاء مكتوب عليها

لم استطع التعبير، لذا انفجرت

هذا وقد صرح اللواء..........................................

Wednesday, February 17, 2010

تهنئة


تحتفل الصديقة العزيزة سارة درويش (سمو الاميرة سارة) في هذه الايام بالعيد القومي الثاني لمملكة اللسعان الخاصة بها (مدونة بنوتة لاسعة) لذا فقد وجب علي تهنئتها بهذه المناسبة.


مبروك يا سارة العيد القومي التاني، يارب تفضلي لاسعة على طول و نشوفك في السراية الصفرا

عنوان المدونة : http://bntlas3a.blogspot.com/

Tuesday, February 9, 2010

rest in peace




مش عارف ليه اليومين دول بفكر في الموت. يا ترى ايه اللي هيحصل لحاجتي بعد ما اموت؟! بفكر اكتب وصية، بس الناس هتتريق عليا. معتز هيقول" انت عندك كام سنة يا عبيط انت علشان تكنب وصية؟"

انا مش قلقان على الحاجات اللي على الكومبيوتر، الحاجات دي انا تعبت فيها جدا، بس انا اتفقت مع معتز ان اللي يموت الاول يسيب الكومبيوتر بتاعه للتاني، هو اكيد فاكرني بهزر ، بس لما اموت هيعرف اني بتكلم بجد.


ياترى ايه اللي هيحصل للكتب؟ مش عاوزهم يفضلوا محطوطين على الرفوف لحد ما التراب يا كلهم، و اكيد مش عاوزهم يتباعوا بالكيلو. ممكن اسيبهم لقرايبي، بس مفيش فيهم حد مهتم بالقراءة اوي. اغلب الظن هسيبهم لاصدقاء الصالون، هما اللي هيقدروا قيمتهم. كتب الفلسفة لجلال، بيحب هو الحاجات المعقدة اللي تجيب صداع.


الوكيل ممكن يحب الترجمات، عندي ترجمات لديكنز و شيكسبير و تولستوي و غيرهم كتير.


امى بقي الكتب الانجليزي، فاكيد يسري هيحبها قوي. دايما بيقول انه عاوز يقرا انجليزي. ممكن برضوا بسنت تكون مهتمة بالكتب الانجليزي بحكم التخصص.

الروايات و المجموعات القصصية هسيبها ع المشاع، اللي عاوز حاجة ياخدها.


مش عاوز حد يزعل عليا لما اموت لاني مش هزعل على حد، مش عاوز تلات ايام عزاء و لا اربعين و لا ذكرى سنوية، ادفنوني و كملوا حياتكم ولا كاني جيت.


مش عاوز اندفن في الترب زي باقي الناس، عاوز اندفن في جنينة جميلة الناس متبقاش متشائمة وهي جاية تزورها. عاوز اندفن على طريقة الامريكان، حفرة في الارض ترموني فيها، و تحطوا شاهد عليه اسمي و تاريخ الوفاة. يا سلام لو يبقى مكتوب عليه " مسامحينك على كمية الوقاحة اللي طلعت منك، عارفين انك كنت بتهزر"


مش عاوز حد يلبس اسود و هو جاي يزوني، البسوا احمر، طول عمري بحب اللون الاحمر.و اللي يجي يزورني لازم يجيب معاه ورد ، انا بحب الورد قوي.


عاوز بعد ما اموت يتاخد مني كل الاعضاء اللي ممكن تنفع حد تاني. الكليتين و الكبد و القلب و قرنية العين و حتى الجلد. الحاجات دي حتي لو اتباعت في السوق السودا ممكن تنقذ حياة واحد ميستاهلش انه يموت.


انا مش متشائم، انا بس ببص بعيد اوي في المستقبل، او يمكن قريب قوي، مين عارف



مستوحاة من تدوينة "لما الشتا يدق الببان" لرحاب بسام، مدونة حواديت

قررت اعيش




بقالنا اكنر من سنة متكلمناش، بس عمرك ما بعدتي عن تفكيري. قد ايه كنت غبي لما عاملتك زي باقي اصحابي. كنت بحاول اقنع نفسي اننا

مجرد اصحاب و ان الموضوع ميتعداش شوية محادثات ع النت. لكن لما سيبتيني اتاكدت اني بحبك، بحبك قوي ، بحبك جدا.


تعرفي؟ انتي خليتيني افقد الثقة في كل البنات. خليتيني ابقى متاكد ان البنات كلهم كدابين و هيسيبوني في وقت انا محتاجلهم اكنر من اي حد تاني. لكن بالرغم من كده مش عارف اكرهك.


مش قادر افتكر حاجة وحشة قولتيها او عملتيها. مش عارف الاقي فيكي عيب غير انك محبيتينيش.

كانت غلطة عمري لما قررت اقابلك و نروح مع بعض، كان لازم اروح لوحدي زي ما كنت ناوي. لو ما كنتش شوفتك ما كنتش حبيتك اوي كده. دمرتي اتزاني النفسي و خليتيني فاضي من جوه.


بس تعرفي؟ انا مسامحك. مسامحك لانك متستاهليش اني ازعل منك، مسامحك لاني قررت اشوف الجانب الايجابي للتجربة


مسامحك لاني - و بعد اكتر من سنة - قررت اني اعيش


بس يا ترى انتي مسامحة نفسك ؟

شعور بالراحة

لازم اروح دلوقت حالا. انا عارف الشعور ده، و دايما مش يقدر اتحكم فيه. الحل الوحيد في البيت.
سيبت اصحابي و مشيت باقصى سرعة ممكن امشي بيها من غير ما انفجر، المشكلة اني مش معايا فلوس اركب تاكسي، و اقرب اتوبيس مش قريب اوي يعني.

انا خلاص ، مش قادر، فاضل ثانية و افرقع. لقيت اتوبيس بيهدي علشان المطب رحت ناطط فيه. عاوز اصرخ بس الناس هيقولوا عليا مجنون. يوصل الاتوبيس اروح نازل بسرعة و امشي في اتجاه البيت. ينده عليا واحد صاحبي و مردش عليه. اكيد هيزعل بس هعرف اصالحه، المهم اوصل البيت الاول و بعدين ربنا يسهل.

اوصل البيت و اطلع السلم. فين المفتاح؟! المفتاح راح فين؟ اه اهوه. فتحت الباب و طلعت اجري حتى من غير ما اقفله ورايا.

الحمام........... لازم ادخل الحمام. اكيد اللي اخترع التواليت خد جايزة نوبل ، لان التواليت ده اختراع عبقري. بس لا، الحمام ممكن يستنى، المهم اوصل للكومبيوتر. قالولي هيردوا عليا الساعة 2 و دلوقت بقت 2 و ربع. اكيد الايميل وصل.

اهوه، الاميل اهوه. يا سلااااااااااااااام. لقيت الايميل و الجواب بالموافقة. عمري ما ارتحت كده ابدا، لا لسة الراحة مكملتش، لازم ادخل الحمام بقى.




مستوحاة من تعليقات للاصدقاء محمد الوكيل و احمد الفقي

Wednesday, February 3, 2010

الموبايل على ودنه و السيجارة في بقه

الموضة اللي ماشية اليومين دول في العالم هي اضرار المحمول. العلماء شغالين خناق و ضرب في بعض عشان الموضوع ده. واحد يقولك المحمول مش ضار خالص و التاني يقولك ان الاولاني حمار و ان المحمول ضار اخر حاجة.

الجديد في الموضوع ده بقى ان المحمول بياثر على الفص الشمال في المخ بس، و لان الفص الشمال ده فيه مركز الكلام، العلماء بينصحوك بانك تحط الموبايل على ودنك اليمين. انا شخصيا شايف ان كل ده كلام في الهوا، اللي بيتقال على المحمول اتقال قبل كده عن التليفزيون و الراديو و التلاجة و التكييف. و حتى لو الاجهزة دي ثبت ضررها، حد يعرف يعيش من غير تلاجة ؟!!!! ـ

بس فيه ناس بقى شايفة ان احنا نعرف نعيش من غير موبايل، ووصل بيهم الامر لدرجة ان هما عاوزين يحطوا على الموبايلات صورة زي اللي على علب السجاير، الموبايل ضار اخر حاجة و هيخليك تموت جدا.

بمناسبة السجاير، شفت الصورة الجديدة اللي على العلبة؟ اكيد شفتها يعني حتى لو انت مش مدخن! ايه؟ مشفتهاش والله؟ ماشي يا عم، هاخدك على قد عقلك و اصدقك.

العلب اليومين دول عليها صورة سيجارة معووجة و كاتبين جنبها ان التدخين لفترة طويلة يؤثر على العلاقة الزوجية!!!!!!!!!! يعني هو التدخين بيؤثر على العلاقة الزوجية بس ؟ يعني لو واحد ماشي في الحرام، سيجارته مش هتتعوج؟

و بعدين افرض ان اللي بيدخن السجاير دي ست مش راجل، المفروض ان صورة السيجارة المعووجة تخوفها ليه؟! الصراحة انا شايف ان الصورة دي اغبى صورة اتحطت من ساعة ما ابتدوا موضوع الصور ده. على الاقل الصورة بتاعت الست الحامل خلتني انا شخصيا مشربش سجاير قدام العيال الصغيرة علشان لما يجيلهم تخلف عقلي من التعليم الحكومي بتاعنا ، محدش يلزقها فيا و يقوللي ان دخان سيجارتي هو السبب. انما الصورة الجديدة دي خلتني اضحك انا و اصحابي لحد ما عنينا دمعت.

و الله كله كلام فارغ، تخيل انك رايح لواحد ميكانيكي و للا جزار تقولله ان الموبايل هيخليه اخرس و ان الدخان هيخلي سيجارته تتعوج و علاقته الزوجية تبوظ، اكيد هيرد عليك يقوللك، يا عم دي اشتغالات عملاها الحكومة علشان تغلي الاسعار، و بعديت يروح مولع السيجارة و مطلع الموبايل و هاتك يا كلام مفعم بالدخان عندا في الحكومة.

و صباح الفل

Sunday, January 24, 2010

ماهي كوسة



من كام يوم كده، امي تعبت شوية و احتاجت حبة فحوصات و تحاليل و الذي منه. خدتها و رحنا المستشفى اللي بتشتغل فيه خالتي علشان تقوم بالواجب و كده. و احنا داخلين وحدة الاشعة المقطعية ، خالتي نفضت للممرضة اللي ع الباب وراحت داخلة للدكتور على طول. مفيش خمس دقايق كانت امي بتعمل الاشعة. و انا قاعد في الانتظار بقى ، ركزت مع تعلقات الناس

" طبعا مش دكتورة، لازم يعملوا معاها الواجب"
"يعني حرام ده ولا حلال يدخلوا ست قد البقرة كده قبل الواد الصغير ده "
" متزعلش يا ست، اصل البلد دي ماشية بالكوسة"


ايوة البلد ماشية بالكوسة، مش عارف ايه اللي مضايقهم.
خليني اسالك سؤال، لو انت والدك لواء شرطة، هتروح تعمل البطاقة زي بقية البشر ولا هتقعد في بيتكو و تستنى البطاقة تجيلك لحد عندك؟
لو تعرف حد في المرور، هتتلطع ساعتين عشان تجدد رخصتك؟
بلاش يا عم، لو انت تعرف الراجل اللي بيبيع العيش، ه تقف في الطابور؟ طبعا لا/ يبقى ليه بقى بتتضايق لما تاقي حد بيمشي مصلحته بالكوسة؟ هو عشان انت معرفتش تمشي امورك ، يبقى الناس اللي عرفوا وحشين و بقر؟
لما تبقى الكوسة لحد غيرك تبقى زبالة لكن لما تبقى ليك تبقى مارون جلاسيه؟
لو الكوسة مضايقاك اوي كدة، ليه مش بتقول لا؟ ليه بتقبل المعاملة الخاصة لما بتلاقيها؟
لو الكوسة مضايقاك اوي كده، ليه مش بتقف في طبور العيش زي بقية البشر حتى لو اللي بيبيع هو ابنك او اخوك او صاحبك؟
يعني انت عاوز تاخد عيش قبل الناس لكن مش عاوز حد يعمل اشعة قبلك؟

اعذرني ، لكن انت منافق و بتضحك على نفسك. و لحد ما تواجه نفسك بالحقيقة دي، هتفضل تعبان، و محدش هيعبرك

شعور بالعظمة (احلام مراهق)

مجرد شاب في عمر المراهقة. تراني كثيرا في كل مكان. امثالي بالالاف في الجامعات و على نواصي الشوارع في كل المدن. لا يميزني عنهم اي شيئ على الاطلاق.
يومي عادي جدا. يبدا بعد الظهر مثل كل من في عمري -او معظمهم على الاقل- و ينتهي بعد منتصف الليل بفترة ليست بالقليلة. الا ان يومي يختلف تماما في اللحظة التي اطفئ فيها الاضواء ليغلف الظلام غرفتي، و بعد ان ادخل تحت اغطيتي
في هذه اللحظة، اكف عن كوني مجرد مراهق. في هذه اللحظة اطلق العنان لخيالي ليفتح لي عوالم لم يدخلها بشر.
في هذه اللحظة انا اقوى من شمشون و اغنى من قارون
انا اوسم من ليوناردو دي كابريو و اسرع من ادهم صبري
انا اذكى من بيل جيتس و انقى صوتا من سيلين ديون
انا اكثر شعبية من الاميرة دايانا و ابرع في الرقص من مايكل جاكسون
في هذه اللحظة، انا ملك العالم ، بل الكون كله
اقترب من الكمال حتى اكاد المسه باناملي
في هذه اللحظة، انا اقرب ما يكون البشر الى الالوهية
لكن اللحظة تمر، لادخل في عالم الاحلام التي لا اذكر منها شئ
تنتهي حالة النشوة التي امر بها مع اخر قطرات الوعي التي تنساب الى بحر من الفراغ، لاستيقظ في الصباح التالي
مجرد مراهق عادي

Friday, January 22, 2010

ولا مؤاخذة



قاعدة الكبانيه عندنا مكسورة. لكن لان الكسر مش كبير فمحدش عاوز يكلف نفسه و يغيرها. بس بالرغم من أن الكسر مش كبير، كل مرة بقعد علشان اعمل.....احم.... مكالمة تليفون مهمة، القاعدة بتوجع لي رجلي. كل مرة بقول ""يوه القاعدة دي لازم تتغير" و أول ما اخلص ال...احم... مكالمة، بنسى الموضوع تماما. اقولك، تعالى نتكلم عربي شوية. الكلام السابق - رغم انه صحيح، و المشكلة في طريقها للحل – يعبر عن حال بلدنا العزيز حاليا. و بالرغم من انك ربما تعتقد أنني لست في حالة عقلية جيدة بسبب القاعدة المكسورة، إلا أنني اعتقد انه كلام دقيق جدا.اعذرني هاقطع حبل أفكارك، اصل العربي ده مش نافع معايا. كنا بنقول إيه، أه قاعدة الكبانيه. لو تبص في أي حتة في مصر هتلاقي قاعدة الكبانيه المكسورة. خد عندك نظام التعليم. النظام كله قاعد على قاعدة مكسورة، و الكسر عمال يكبر. لكن لحد ما القاعدة تتدشش خالص، محدش هيتعب نفسه و يغيرها.عاوز مثال تاني؟ اقولك. حادثة القطر الاخرانية دي، إيه اللي حصل بعديها؟ الوزير استقال. يا فرحة قلبي. و بعدين يعني؟ أهالي الناس اللي ماتوا دول هيعملوا إيه باستقالة الوزير؟ على الأقل رجل الوزير اللي وجعته من القاعدة كانت هتخليه يغيرها. لكن لا، أنا أغير القاعدة ليه؟ أنا اعزل من البيت و اسيب القاعدة لحد تاني يا يغيرها يا ميغيرهاش.البلد كلها قاعدة على قاعدة مكسورة، و لحد القاعدة متتغير، هتفضل رجلينا توجعنا.

Wednesday, January 20, 2010

تهييس اخر حاجة

امبارح صحيت الصبح بدري عشان كنت عاوز اروح الكلية اشوف اخبار الامتحانات. اصل انا الترم ده معنديش غير تلات مواد من اصل ستة عشان انا عايد السنة. المهم، نزلت من البيت و ركبت تاكسي، و دي حاجة انا نادرا لما بعملها لان انا ساكن بعيد عن الكلية و التاكسي بيقلبني صح في الكاشات، بمناسبة التاكسيات، حد سمع عن حوار التاكسي الحريمي ده ؟ بيقولك هيبقى لونه بمبة مسخسخ، و هيسوقه حريم و ميركبوش غير الحريم. و بعدين يقوللك المساواة بين الرجل و المراة. يعني انا لو مروح الساعة اتنين بالليل و مش لاقي غير التوكسة الحريمي، مروحش؟ قال مساواة قال.

المهم، انا بقى لما ركبت التاكسي لقيت الراجل بيفتح في مواضيع غريبة الصراحة. مش عارف ليه معظم السواقين بيكلموني في حاجات غريبة اخر حاجة، تلاقي سواق بيكلمني عن فلسطين اللي بتتاكل، و والله يا بيه لولا المرة و العيال اللي مرميين في البيت لا كنت طلعت على اسرائيل دي دششتها. او تلاقي واحد تاني يكلمني عن الحرامي اللي سايق عربية بمليون جنيه جايباهالو امه، منين حرامي و منين جايباهاله امه؟ مش عارف ليه نادرا لما بقع في سواق عادي كدة يكلمني في موضوع طبيعي، زي مثلا ماتش مصر و بنين اللي خلص اتنين صفر بالمناسبة، او المزة اللي ماشية في الشارع ببنطلون ضيق اخر حاجة و بعدين تزعل لما الشباب يعاكسوها.

هو انا كنت بقول ايه.؟ اه.... سواق التاكسي ده بقى كان فرحان اوي بالسيول اللي في اسرائيل و والله يا برنس ده غضب ربنا عليهم، اصل الحاجات دي مبتحصلش كدا. و لما قلتله ان فيه سيول في سينا و اسوان و الناس نايمة في الجوامع، بصلي بصة عجيبة كدة زي ما اكون كفرت و راح ساكت.

المهم وصلت الكلية حتة واحدة الحمدلله. و انا داخل بقى كانت البوابة مفتوحة على وسعها و البشر داخلة طالعة بدون رقيب، قولت كفاءة، اصل انا كنت نسيت الكارنية، و الحرس ميحلالهومش ان هما يسالوني ع الكارنيه غير لما اكون ناسيه، و يبقى الراجل معدي سبع انفار قبلي من غير ما يكح في وشهم و تيجي عليا انا و تقفل. المهم جيت ادخل بقى لقيت العسكري بينده عليا. قال ايه سنة تانية بس اللي تدخل عشان عندهم امتحان، و انت اش عرفك ان انا مش في سنة تانية .؟ المهم سهيت لعسكري و دخلت لقيت ان سنة رابعة هي اللي عندها الامتحان مش تانية. رحت طالع على مكتبة الاشرف اجيب ورق الاقتصاد، اصل انا عندي امتحان يوم 25 و لسة لحد دلوقت معرفش ولا كلمة. و بعدين اصل الاقتصاد مهم جدا في البلد، عشان كدة تلاقي اقتصاد وعلوم سياسية بتاخد مجموع كبير اوي.

بمناسبة المجموع الكبير، انا كنت جايب مجموع كبير نسبيا في تانية ثانوي، معرفش ايه اللي حصل في تالتة خلاني اجيب مجموع زي الزفت مع اني كنت مذاكر والله. السنة اللي فاتت بقى مفتحتش كتاب و عشان كده وقعت سنة. و بعدين اصل الوقوع مش وحش، يعني التفاحة اللي وقعت على دماغ نيوتن و خلتة يكتشف الجاذبية دي وحشة ؟ و بعدين تفاحة ايه دي اللي لازم تقع على دماغه عشان يكتشف الجاذبية؟ هو وقوفه على الارض في حد ذاته مش جاذبية؟ تلاقيه كان شارب ربع حشيش كان واخده هدية من سواق تاكسي كان راكب معاة لما جه بشقر على الهرم في ستة اكتوبر، ميعرفش ان الحتة دي كانت جر رجل و بعد كدة هيدوله حشيش مغشوش.

اصل كل حاجة بقت مغشوشة في البلد دي. تيجي تشتري اتنين فول وواحد طعمية، تلاقبه جابلك تلاتة بطاطس، و لما تعترض يقوللك يا عم كل و خلاص اه و الله، تروح انت واكل زي الفل و تتكتم. هو انا كنت بتكلم عن ايه اصلا؟ ................ اه مكتبة الاشرف، رحت هناك بقى يا عم لقيت معندوش ورق انجليزي، طب اجيبة منين و النبي يا كبتن، يقوللك معرفش و بعدين تلاقيه عند المكتبة اللي قدامة بالظبط. المكتبة دي بقى كانت لسة فاتحة جديد نوفي ، و الطلبة كانوا عليها امم مش عارف ليه.

بمناسبة حكاية الطلبة اللي امم دول، تلاقي يا اخويا محلات كتيرة فتحت السنادي حوالين الكلية، دشليون مكتبة و عشرتاشر محل قهوة و كابوتشينو و فرابتشينو و نسكافية و قهوة تاني و ملك شيك و شوكولاتة سخنة في عز الحر. محدش بيبيع شاي خالص، و انا اصلا مبحبش الشاي، بس احيانا بكون قاعد على قهوة، و بعدين اطلب شاي معرفش ليه. تقريبا لان مينفعش اطلب شيشة بس. الشيشة دي بقى حاجة جامدة جدا، تشد النفس من دول تلاقيه مطلع دخان قد كدة. و بعدين اصل مفيش دخان من غير نار، و المتعاص بيعوص غيره، و اللي مبيتعاصشي بيتلط.

هو يعني ايه بيتلط؟ دايما بتكسف اسال. و انا في اولى اعدادي، كنت لما بقول لبابا ان انا مكسوف اسال على حاجة، يقوللي عيب عليك وانت قد البغل كده تتكسف. دلوقت بقيت مبتكسفش خالص، ممكن يكون الموضوع وصل عندي لحد الوقاحة. اللي وقح بجد بقى دكتور الاقتصاد، بس بيقولوا هيجيبلنا امتحان سهل. ربنا يستر.

نرجع مرجوعنا، بعد ما جبت الورق روحت البيت بالاوتوبيس المرادي، و روحت رامي الورق على المكتب و دخلت انام. لما اصحى ابقى اذاكر بقى. هو الامتحان كان يوم ايه؟ استنى لما ابص في الكالندر........... اه يوم 25، طب الساعة كام بقى؟؟؟؟؟ لازم افتكر اتصل بالواد عمرو اساله. سلام دلوقت بقى عشان عاوز انام و بعدين انت رغاي اوي و بتتكل كتير و مش هتخليني انام

القهوة





اهلا بيك ف القهوة. ادخل متتكسفش، دي القعدة لسة هتبتدي و المشاريب ببلاش.

في القهوة هتسمع كل حاجة، راجل عجوز بيكلم في السياسة ، او شاب صغير بيتكلم في الرياضة. هتلاقي عيل صغير بيكلم اصحابه عن اخر فيديو جيم، و هتلاقي واحدة بتكلم صاحبتها عن البلوزة اللي اشترتها امبارح.

ايوة، هتلاقي بنات في القهوة. المكان راقي بالرغم من اسمه، و مناسب لجميع الاعمار و الاجناس.

القهوة على طول مفتوحة، عمرك م هتيجي و نقوللك لا. مش عاوزينك تقلق، دايما هتلاقي مكان. عاوزينك بس ترتاح في الكرسي و تطلب زي ما انت عاوز.

في القهوة كل الناس اصحاب، محدش بيحرج حد حتى لو اعترض على وجهة نظره.

انا عارف انك لسة جديد، و انا مش اقدم منك ولا حاجة، صدقني هتحب الجو، في القهوة كله صاحب مكان.

ادخل متتكسفش، دي القعدة هتحلو و المشاريب على طول ببلاش